29 сакавіка 2019 года а 17 гадзіне ў Рэспубліканскай мастацкай галерэі (Палац мастацтва, вул. Казлова, 3) адбудзецца адкрыццё выставы жывапісу, скульптуры і керамікі “Візуалізацыя. Творчы шлях” вядомай беларускай мастачкі Ліліі Нішчык, прымеркаванай да юбілею аўтара і арганізаванай ГА «Беларускі саюз мастакоў», Рэспубліканскай мастацкай галерэяй.

 

Традыцыі – гэта заўсёды пышнасць і бляск сучаснасці, якія ўвабралі ў сябе мудрасць і прыгажосць стагоддзяў і скіраваныя ў будучыню.

А. Юркоў.

 

Выставачны арт-праект Ліліі Нішчык аб’яднаў у сабе творы мастацтва, якія былі зроблены на працягу 35 гадоў творчасці. У праект увайшло больш за 40 жывапісных работ (нацюрморты, партрэты, пейзажы), каля 40 скульптур і керамічных арт-аб'ектаў і больш за 25 аб’ектаў дробнай пластыкі (кубкі, імбрыкі, талеркі).

Аўтарскія творы даволі складаныя па форме і зместу. Мастак імкнецца насыціць іх глыбокім сэнсам, які скіроўвае на разважанні ды выклікае цікаўнасць да пытанняў чалавечага быцця.

У прапанаваным арт-праекце экспазіцыя падзеленая на асобныя структурныя часткі: міфалагемы архаікі Беларусі, міфы і сімвалы, рэальнае і міфічнае ў скульптуры, сузіранне, таемнае і відавочнае.

Усведамленне глыбіннага сэнсу гістарычнай спадчыны прывяло аўтара да стварэння гэтых праектаў, у якіх успрыняцце навакольнага свету, адчуванні, перажыванні, уражанні і фантазіі фармуюцца ў міфалагемы і ўвасабляюцца ў арт-аб’ектах. Метафізічная трансфармацыя сімвалаў пераходзіць у візуалізацыю вобразаў і фармуецца праз індывідуальнае ўсведамленне прасторы і часу. У створаных вобразах мінулае сплятаецца з сучаснасцю, імгненнае з вечным, ілюзорнае з рэальным.

Тэма ўзаемадзеяння чалавека і прыроды, унутраныя супярэчнасці, наканаванасць учынкаў і паводзін чалавека як індывіда і як часткі соцыума адлюстравана ў праекце “індывідуалізацыя”.

Сузіраючы прыроду і навакольны свет, аўтар стварае сваю індывідуальную мастацкую прастору.

Лілія Нішчык, выпускніца Мінскага мастацкага вучылішча імя А. К. Глебава і Беларускай дзяржаўнай акадэміі мастацтваў, удзельнічае ў выставах з 1988 года. Мастацкія творы члена Беларускага саюза дызайнераў і Беларускага саюза мастакоў Ліліі Нішчык захоўваюцца ў калекцыях Нацыянальнага цэнтра сучасных выяўленчых мастацтваў Рэспублікі Беларусь, Нацыянальнага мастацкага музея Рэспублікі Беларусь, Нацыянальнага гістарычнага музея Рэспублікі Беларусь, Дзяржаўнага мастацкага музея г. Бабруйска, Лідскага і Гродзенскага дзяржаўных гісторыка-археалагічных музеяў,  Музея гісторыі горада Мінска, галерэі ім. М. Савіцкага, Нацыянальнага музея Кітая, Дзяржаўнага музея сучаснага мастацтва Францыі, пасольствах Рэспублікі Беларусь у Францыі, Германіі і іншых краін, а таксама ў прыватных калекцыях Рэспублікі Беларусь і за мяжой.